கொரோனா வைரஸ் பாதிப்பால் சில்லறை விற்பனைத் துறையில் வருவாய் இழப்புகள் அதிகரித்துள்ளதோடு, 2 லட்சம் பேருக்கு வேலைவாய்ப்புகள் பறிபோகும் சூழல் ஏற்பட்டுள்ளது.

சில்லறை விற்பனையில் 2 லட்சம் வேலைகளுக்கு ஆபத்து

கடந்த ஒரு மாதத்துக்கும் மேலாக கொரோனா வைரஸின் பாதிப்பு இந்தியாவின் அனைத்து துறைகளையும் கடுமையாகப் பாதித்துள்ளது. கொரோனா பாதிப்பால் இந்தியாவில் இதுவரையில் 8 பேர் உயிரிழந்துள்ள நிலையில், 433 பேர் பாதிக்கப்பட்டுள்ளனர். பொருளாதார ரீதியாகவும், வர்த்தக ரீதியாகவும் கொரோனா பாதிப்பு இந்தியாவை மெல்ல மெல்ல மூழ்கடித்து வருகிறது. கொரோனா பாதிப்பு முன்னெச்சரிக்கை நடவடிக்கையாக அரசு தரப்பிலிருந்து மக்கள் ஊரடங்கு உள்ளிட்ட பல்வேறு நடவடிக்கைகள் மேற்கொள்ளப்பட்டு வருகின்றன. இருந்தபோதிலும், கொரோனாவின் பாதிப்புகள் இன்னும் முழுமையாகக் கட்டுப்படுத்தப்படவில்லை.

தொழில் துறையைப் பொறுத்தவரையில், பல்வேறு நிறுவனங்கள் தங்களது உற்பத்தியைக் குறைத்துள்ளன; ஆலைகள் பல மூடப்பட்டு வருகின்றன. ஊழியர்கள் வீட்டில் இருந்தபடியே வேலைபார்க்க அனுமதிக்கப்பட்டுள்ளனர். அத்தியாவசியப் பொருட்கள் தவிர்த்து மற்ற பொருட்களின் விற்பனை வீழ்ச்சியடைந்துள்ளது. ஜவுளி, நகை ஆகியவற்றின் விற்பனை 75 சதவீதம் வரையில் வீழ்ச்சியடைந்துள்ளதாக அத்துறையினர் கவலை தெரிவித்துள்ளனர்.

உலகப் பொருளாதாரத்தைப் பீடிக்கும் கொரோனா நோய்!

இந்திய சில்லறை வர்த்தகத் துறையில் இருக்கும் பணியாளர்களில் 40 சதவீதத்தினர், அதாவது சுமார் 2 லட்சம் பேர் தங்களது வேலையை இழப்பார்கள் என்று இந்திய சில்லறை வர்த்தகர்கள் கூட்டமைப்பின் தலைமைச் செயலதிகாரியான ராஜகோபாலன் தெரிவித்துள்ளார். எனவே மத்திய அரசு இதில் தலையிட்டு வேலையிழப்புகளைக் காக்க வேண்டும் என்று இத்துறையினர் கோரிக்கை வைத்துள்ளனர். அதற்கு கொரோனா பாதிப்புகளைக் கட்டுப்படுத்துவது மிக முக்கியமானதாகும்.

கார் வேணுமா, கொரோனா வேணுமா? கார் உற்பத்தி நிறுத்தம்!

அரசு தரப்பிலிருந்து இத்துறையினருக்கு இழப்பீடு எதுவும் வழங்காவிட்டால் அடுத்த ஒன்பது மாதங்களில் 90 சதவீதம் வரையில் வருவாய் இழப்பு ஏற்பட வாய்ப்பிருப்பதாகவும் எச்சரிக்கப்பட்டுள்ளது. கொரோனா பாதிப்பு இந்தியாவில் அதிகரிக்கத் தொடங்கியதையடுத்து, வி-மார்ட், ஷாப்பர்ஸ் ஸ்டாப், ஃபியூச்சர் குரூப், அவெனியூ சூப்பர் மார்ட் உள்ளிட்ட சில்லறை வர்த்தக நிறுவனங்களின் வருவாய் கடுமையாகப் பாதிக்கப்பட்டுள்ளது.