மும்பை: இந்திய கிரிக்கெட் அணியின் நட்சத்திர வீரர் ரோஹித் ஷர்மா, கொரோனா வைரஸூக்கு எதிரான போராட்டத்திற்காக ரூ. 80 லட்சம் நிதியுதவி அளித்துள்ளார்.

இந்தியாவில் பரவி வரும் கொரோனா வைரஸுக்கு எதிரான மருத்துவ தேவைகளுக்காக பலரும் நிதியுதவி அளித்து வருகின்றனர். அதில் இந்திய கிரிக்கெட் போர்டு (பிசிசிஐ) ரூ. 51 கோடியை பிரதமர் நிவாரண நிதிக்கு அளித்துள்ளது. இந்திய கிரிக்கெட் வீரர்களான சுரேஷ் ரெய்னா ரூ. 52 லட்சமும் , சச்சின் ரூ. 50 லட்சமும் வழங்கியுள்ளனர்.

வீரர்களும்
மேலும் பல இந்திய விளையாட்டு வீரர்களான ஹிமா தாஸ், பிவி சிந்து , கங்குலி, பஜ்ரங் பூனியா ஆகியோரும் தங்களால் முடிந்த உதவிகளை அளித்துள்ளனர். இதற்கிடையில் முன்னாள் இந்திய கிரிக்கெட் அணியின் கேப்டன் தோனி ரூ. 1 லட்சம் வழங்கியதாக வெளியான தகவலை அவரின் மனைவி ஷாக்சி மறுத்தார்.

கோலி ரூ. 3 கோடி
இந்திய கிரிக்கெட் அணியின் கேப்டன் விராட் கோலி மற்றும் அவரின் மனைவி அனுஷ்கா சர்மா ஆகியோர் கொரோனா தாக்குத்துக்கு எதிரான போராட்டத்துக்காக தொகை குறிப்பிடாமல் நிதியுதவி அளித்தனர். ஆனால் அவர்கள் ரூ. 3 கோடி நிதி வழங்கியதாக பாலிவுட் வட்டாரங்கள் தகவல்கள் அளித்தன.

மருத்துவ பணியாளர்களுக்கு ஆதரவாக மொட்டை போட்டுக்கொண்ட பேட் பாய் வார்னர்… கோலிக்கும் சவால்!

பிரித்து வழங்கிய டான்
அந்த வகையில் இந்திய கிரிக்கெட் அணியின் துவக்க வீரர் ரோஹித் ஷர்மா ரூ. 80 லட்சம் நிதியுதவி அளித்துள்ளார். இதில் ரூ. 45 லட்சம் பிரதமர் நிவாரண நிதிக்காகவும், ரூ. 25 லட்சம் மகாராஷ்டிரா நிவாரண நிதிக்காகவும் ரோஹித் ஷர்மா வழங்கியுள்ளார். மேலும் ரூ. 5 லட்சத்தை தேசிய முடக்கத்தால் உணவு கிடைக்காமல் தவிக்கும் குடும்பங்களுக்கும், ரூ. 5 லட்சம் நாய்களின் நலனுக்காகவும் வழங்கியுள்ளார். இதை தனது ட்விட்டர் பக்கம் மூலம் ரோஹித் தெரிவித்துள்ளார்.