ஏப்ரல் 5 ஆம் தேதி இரவு 9 மணிக்கு அனைவரும் தங்களது வீடுகளில் விளக்கு ஏற்றி, டார்ச் காட்ட வேண்டும் என்று பிரதமர் மோடி இன்று அறிவிப்பு வெளியிட்டுள்ளார்.

இந்தியாவை கொரோனா வைரஸ் பெரிய அளவில் தாக்கி இருக்கும் நிலையில், ஏப்ரல் 5 ஆம் தேதி இரவு 9 மணிக்கு அனைவரும் தங்களது வீடுகளில் விளக்கு ஏற்ற வேண்டும் என்று பிரதமர் கேட்டுக் கொண்டார்.

ஏன் விளக்கு ஏற்ற வேண்டும் என்பதற்கான எந்த விளக்கத்தையும் பிரதமர் அளிக்கவில்லை. இதனால், பலரும் தங்களுக்கு தெரிந்த விளக்கங்களை அளித்து வருகின்றனர். அன்று சூரியனுக்கு வெளியே முக்கிய கோள்கள் அனைத்தும் நேர் கோட்டில் இருக்கும் என்பதால் விளக்கு ஏற்ற வேண்டும். அப்போது கெட்ட சக்திகள் பூமியில் விழுவது தவிர்க்கப்படும் என்று விளக்கம் அளிக்கப்படுகிறது.

இதேபோல் கடந்த மார்ச் 22ஆம் தேதியும் அனைவரும் வீட்டை விட்டு மாலை 5 மணிக்கு வெளியே பால்கனிக்கு வந்து கை தட்ட வேண்டும், மணி அடிக்க வேண்டும். இதன் மூலம் மருத்துவர்கள், தூய்மை பணியாளர்கள், பத்திரிக்கையாளர்களுக்கு நன்றி செய்வதாக இருக்கும் என்று தெரிவித்து இருந்தார்.

அதன்படியே கைகளை தட்டி புகைப்படம் எடுத்து, வீடியோ எடுத்து சமூக வலைதளங்களில் பலரும் பதிவு செய்து இருந்தனர்.

தற்போது வீட்டு விளக்கை அணைத்துவிட்டு இரவு 9 மணிக்கு வீட்டின் நான்கு மூலைகளிலும் விளக்கு ஏற்ற வேண்டும், டார்ச் காட்ட வேண்டும் என்று கேட்டுக் கொண்டுள்ளார். ஆதலால் மறந்தும், மருத்துவமனைகளில் இருக்கும் மின்சாரத்தை யாரும் நிறுத்தி விடக் கூடாது. பிரதமேரே சொல்லி விட்டார் என்று ஆர்வக் கோளாறில் யாராவது மருத்துவமனையில் மின்சாரத்தை துண்டித்து விடாமல் பார்த்துக் கொள்ள வேண்டும். பல நோயாளிகளும் அவசர சிகிச்சைப் பிரிவில் இருக்கும் நிலையில், அவர்களுக்கு எந்த பாதிப்பும் ஏற்படாமல் பார்த்துக் கொள்ள வேண்டும்.
கோ