இந்திய கிரிக்கெட் அணியின் கேப்டன் விராட் கோலி தன் கிரிக்கெட் வாழ்நாளின் மோசமான தருணத்தை தெரிவித்துள்ளார்.

இந்திய கிரிக்கெட் அணியின் கேப்டன் விராட் கோலி. சர்வதேச கிரிக்கெட் அரங்கில் நம்பர்-1 பேட்ஸ்மேனாக உள்ளார். இந்திய ஜாம்பவான் சச்சினின் சாதனைகளை வேகமாக துரத்தி வரும் கோலி, விரைவில் அதை தகர்ப்பார் என்றும் தெரிகிறது. இதற்கிடையில் சமீபத்தில் இங்கிலாந்து கிரிக்கெட் வீரர் கெவின் பீட்டர்சனுடன் இன்ஸ்டாகிராம் நேரலையில் விவாதம் செய்தார்.

அப்போது தனது கிரிக்கெட் பயணத்தின் மோசமான தருணம் குறித்து பேசினார். அதில் கடந்த 2014 இல் இங்கிலாந்தில் பங்கேற்ற டெஸ்ட் தொடர் தான் மிகவும் மோசமான் தொடர் என கோலி குறிப்பிட்டுள்ளார். அப்போது 10 இன்னிங்சில் விளையாடிய கோலி அதிகபட்சமாக 39 ரன்கள் அடித்தார். மேலும் அந்த தொடரில் அவரின் சராசரி வெறும் 13.40 ஆக மட்டுமே இருந்தது.

இதுகுறித்து கோலி கூறுகையில், “ஒரு பேட்ஸ்மேனாக, அதிகாலையில் எழுந்த உடனே இன்று நாம் அவுட்டாகி விடுவோம் என தெளிவாக தெரியும். அந்த காலகட்டம் தான் நான் ரன்கள் சேர்க்க பெரிய அளவில் வாய்ப்பு இல்லை என உணர்ந்தேன். இருந்தாலும் படுக்கையில் இருந்து எழுந்து டிரெஸ் பண்ணி சொதப்புவோம் என தெரிந்தே சென்றேன். ” என்றார்.

தொடர்ந்து நான்கு ஆண்டுக்கு பின் மீண்டும் இங்கிலாந்து சென்ற கோலி, பங்கேற்ற முதல் டெஸ்டில் சதம் விளாசி அசத்தினார். அதோடு அந்த தொடரில் அதிக ரன்கள் சேர்த்தும் அசத்தினார். இதற்கிடையில் 2014 இல் சொதப்பலுக்கு தன்னைப் பற்றி மட்டுமே சிந்தித்ததே காரணமாக அமைந்ததாகவும் கூறினார்.

மேலும் இது தொடர்பாக கூறிய கோலி, “ 2014 தொடர் ஒரு இளம் வீரராக தனிப்பட்ட முறையில் சாதிக்க வேண்டும் என நினைத்தே. அதிகளவில் ரன்கள் சேர்க்க நினைத்தேன். அந்த சூழலில் அணி என்னிடம் என்ன எதிர்பார்க்கிறது என்பதை நான் சிந்திக்கவில்லை.” என்றார்.