ஆசிய விளையாட்டு – துப்பாக்கி சுடுதல் போட்டியில் இந்தியாவுக்கு 2 தங்கம் – Newstamila.com

ஹாங்சோ: ஆசிய விளையாட்டுப் போட்டியின் 4வது நாளான நேற்று துப்பாக்கிச் சுடுதல் போட்டியில் இந்தியா 2 தங்கப் பதக்கங்களை வென்றது.

சீனாவின் ஹாங்சோவில் நடைபெற்று வரும் 19-வது ஆசிய விளையாட்டுப் போட்டியின் 4-வது நாளில் பெண்களுக்கான 50 மீட்டர் ரைபிள் 3 பொசிஷன் பிரிவில் இந்தியாவின் சிஃப்ட் கவுர் சாம்ரா 469.6 புள்ளிகள் பெற்று தங்கப் பதக்கம் வென்று உலக மற்றும் ஆசிய விளையாட்டு சாதனை படைத்தார். மற்றொரு இந்திய வீராங்கனை ஆஷி சௌக்சே 451.9 புள்ளிகளுடன் வெண்கலப் பதக்கம் வென்றார். சீனாவின் ஜாங் குவாங்யு 462.3 புள்ளிகளுடன் வெள்ளிப் பதக்கம் வென்றார்.

பெண்களுக்கான 25 மீட்டர் பிஸ்டல் குழு பிரிவில் இஷா சிங், மனு பாகர், ரிதம் சங்வான் ஆகியோர் அடங்கிய இந்திய அணி இறுதிப் போட்டியில் 1,759 புள்ளிகள் பெற்று தங்கப் பதக்கம் வென்றது. சீனா அணி 1,756 புள்ளிகளுடன் வெள்ளிப் பதக்கத்தையும், கொரியா அணி 1,742 புள்ளிகளுடன் வெண்கலப் பதக்கத்தையும் வென்றன.

ஆண்களுக்கான ஸ்கீட் இறுதிப் போட்டியில் இந்தியாவின் அனந்த் ஜீத் சிங் நருகா 58 புள்ளிகளுடன் வெள்ளிப் பதக்கம் வென்றார். குவைத்தின் அப்துல்லா அல் ரஷிதி 60 புள்ளிகளுடன் உலக சாதனையை சமன் செய்து தங்கப் பதக்கம் வென்றார். ஆண்களுக்கான ஸ்கீட் அணி பிரிவில் ஆனந்த் ஜீத் சிங் நருகா, அங்கத் வீர் சிங் பஜ்வா ஆகியோர் அடங்கிய இந்திய அணி மொத்தம் 355 புள்ளிகள் பெற்று வெண்கலப் பதக்கத்தை வென்றது. சீனா (362) தங்கமும், கத்தார் (359) வெள்ளியும் வென்றன.

பெண்களுக்கான 50 மீட்டர் ரைபிள் 3 பொசிஷன் பிரிவில் சிஃப்ட் கவுர் சாம்ரா, ஷி சவுக்சே, மனினி கவுசிக் ஆகியோர் அடங்கிய இந்திய அணி 462.3 புள்ளிகளுடன் வெள்ளிப் பதக்கம் வென்றது. பெண்களுக்கான 25 மீட்டர் பிஸ்டல் பிரிவில் இந்தியாவின் இஷா சிங் 34 புள்ளிகளுடன் வெள்ளிப் பதக்கம் வென்றார். சீனாவின் ரூய் லியு 38 புள்ளிகளுடன் தங்கப் பதக்கத்தையும், கொரியாவின் ஜின் யங் 29 புள்ளிகளுடன் வெண்கலப் பதக்கத்தையும் வென்றனர்.

கூடைப்பந்து: ஆடவருக்கான 3×3 கூடைப்பந்து போட்டியில் இந்தியா 21-12 என்ற கணக்கில் மக்காவ்வை வீழ்த்தி காலிறுதிக்கு முன்னேறியது.

வாள்வீச்சு: பெண்கள் எபி அணிகள் பிரிவு காலிறுதியில் இந்தியா 25-45 என்ற புள்ளி கணக்கில் கொரியாவிடம் தோல்வியடைந்தது. ஆண்களுக்கான மேட் பிரிவில் காலிறுதிக்கு முந்தைய சுற்றில் 30-45 என்ற புள்ளி கணக்கில் சிங்கப்பூரிடம் தோல்வியடைந்தது.

படகு பந்தயம்: டிங்கி ஐஎல்சிஏ-7 பிரிவில் ஆடவர் படகுப்போட்டியில் இந்தியாவின் விஷ்ணு சரவணன் 34 புள்ளிகளுடன் வெண்கலப் பதக்கம் வென்றார்.

பெண்கள் ஹாக்கி: ‘ஏ’ பிரிவில் இடம் பெற்றுள்ள இந்திய மகளிர் ஹாக்கி அணி தனது முதல் லீக் ஆட்டத்தில் 13-0 என்ற கோல் கணக்கில் சிங்கப்பூரை வீழ்த்தியது.

சங்கீதா குமாரி 3 கோல்களும், நவ்நீத் கவுர் 2 கோல்களும், உதிதா, சுசீலா சானு, தீபிகா, தீப் கிரேஸ், நேகா, சலிமா திதி, மோனிகா, வந்தனா கட்டாரியா ஆகியோர் தலா ஒரு கோலும் அடித்தனர். இந்திய அணி தனது அடுத்த ஆட்டத்தில் நாளை மலேசியாவை எதிர்கொள்கிறது.

ஸ்குவாஷ்: ஸ்குவாஷ் போட்டியில் இந்திய மகளிர் அணி 3-0 என்ற கோல் கணக்கில் நேபாளத்தை வீழ்த்தியது. அனகத் சிங், ஜோஷ்னா, சின்னப்பா ஆகியோர் வெற்றியை பதிவு செய்தனர். இந்திய ஆடவர் அணி 3-0 என்ற கோல் கணக்கில் குவைத்தை வீழ்த்தியது. அபய் சிங், சவுரவ் கோஷல் மற்றும் மகேஷ் மங்கோன்கர் ஆகியோர் தங்கள் போட்டிகளில் வெற்றி பெற்றனர்.