அயோத்தி ராமர் கோயில் கும்பாபிஷேகம்: குடும்பத்துடன் பங்கேற்கிறார் நடிகர் ரஜினி

சென்னை: அயோத்தி ராமர் கோவில் கும்பாபிஷேக நிகழ்ச்சியில் நடிகர் ரஜினிகாந்த், அவரது மனைவி லதா, சகோதரர் சத்யநாராயணா ஆகியோர் கலந்து கொள்ள உள்ளதாக தகவல் வெளியாகியுள்ளது.

உத்தரபிரதேச மாநிலத்தில் உள்ள அயோத்தி ராமர் கோவில் கும்பாபிஷேக விழா ஜனவரி 22ம் தேதி நடைபெற உள்ளது.இதற்கான ஏற்பாடுகளை ஸ்ரீராமஜென்மபூமி அறக்கட்டளையினர் செய்து வருகின்றனர். அன்று மதியம் 12.45 மணிக்கு கோயில் கருவறையில் ராமர் சிலை வைக்கப்படுகிறது. “ஸ்ரீராமர் கோயில் கும்பாபிஷேகம், ஒட்டுமொத்த இந்திய மக்களுக்கும் மற்றொரு தீபாவளிப் பண்டிகையாக இருக்கும் என்பதில் சந்தேகமில்லை. அன்றைய தினம் நாட்டு மக்கள் அனைவரும் தங்கள் வீடுகளில் தீபம் ஏற்றி கொண்டாட வேண்டும் என்று பிரதமர் மோடி வேண்டுகோள் விடுத்துள்ளார்.

ராமர் கோவில் கும்பாபிஷேக விழாவில் பங்கேற்க, நாட்டின் முக்கிய பிரமுகர்கள் மற்றும் அரசியல் தலைவர்களுக்கு அழைப்பு விடுக்கப்படுகிறது. அந்த வகையில் சமீபத்தில் அயோத்தி – ஸ்ரீராம ஜென்மபூமி தீர்த்த க்ஷேத்ரா சார்பில் நடிகர் ரஜினிகாந்தை நேரில் சந்திக்கவும்கும்பாபிஷேக நிகழ்ச்சியில் பங்கேற்க அழைப்பு விடுக்கப்பட்டுள்ளது.

சென்னை போயஸ் கார்டனில் உள்ள அவரது இல்லத்தில் நடைபெற்ற கூட்டத்தில் ஆர்எஸ்எஸ் தென்னிந்திய அமைப்பாளர் செந்தில் குமார், பாஜகவின் அர்ஜுன மூர்த்தி உள்ளிட்டோர் கலந்து கொண்டு அழைப்பிதழ்களை வழங்கினர். அழைப்பிதழைப் பெற்ற நடிகர் ரஜினிகாந்த், தனது குடும்பத்துடன் வருவதை உறுதி செய்ததாகவும், நிகழ்வில் பங்கேற்பதை பாக்கியமாக கருதுவதாகவும் கூறப்படுகிறது.

இந்நிலையில், அயோத்தி ராமர் கோவில் கும்பாபிஷேக விழாவில் பங்கேற்பதற்காக நடிகர் ரஜினிகாந்த் தனது மனைவி மற்றும் சகோதரருடன் வரும் 21ம் தேதி சென்னை விமான நிலையத்தில் இருந்து புறப்பட உள்ளதாக தகவல்கள் வெளியாகி உள்ளன. வரும் 22ம் தேதி அயோத்தி ராமர் கோவில் திறப்பு விழாவில் ரஜினிகாந்த் தனது குடும்பத்தினருடன் பங்கேற்று, மறுநாள் 23ம் தேதி சென்னை செல்கிறார்.