கும்பகோணம் நாச்சியார் கோவிலில் 18 ஆண்டுகளுக்கு பிறகு கும்பாபிஷேகம்

கும்பம்: தஞ்சை மாவட்டம் கும்பகோணம் அருகே உள்ள நாச்சியார் கோவில் கும்பாபிஷேக நிகழ்ச்சி இன்று நடைபெற்றது. திருமங்கையாழ்வார் 108 வைணவத் தலங்களில் ஒன்றான கும்பகோணம் நாச்சியார் கோயில் பெருமாள் பற்றி 100 பாடல்கள் பாடியுள்ளார். மேலும் இக்கோயிலில் பெருமாள் புறப்பாடு நடைபெறும் போது முதலில் 4 பேரும், பின்னர் 8 பேரும், 16 பேரும், இறுதியாக 128 பேரும் சேர்ந்து கல்லான கருடனை கோயிலில் சுமந்து செல்வது சிறப்பு.

அறநிலையத்துறை கட்டுப்பாட்டில் உள்ள இக்கோயிலில் கடந்த 2005ம் ஆண்டு கும்பாபிஷேகம் நடந்தது. இதையடுத்து, 18 ஆண்டுகளுக்கு பின், இக்கோயிலில் கும்பாபிஷேகம் நடத்த முடிவு செய்யப்பட்டு, 2022 நவ., 11ல், கோவிலில், ரூ.1.15 கோடியில் திருப்பணிகள் நடத்தப்பட்டது. திருப்பணிகள் நிறைவடைந்ததை தொடர்ந்து கும்பாபிஷேக விழா கடந்த 23ம் தேதி யாகசாலை பூஜைகளுடன் தொடங்கியது. தொடர்ந்து 8 கால யாக சாலை பூஜைகளுக்கு பின் காலை 9 மணிக்கு ராஜகோபுரம், நடுகோபுரம், மூலவர் விமானம் ஆகிய இடங்களுக்கு கும்பாபிஷேகம் நடந்தது.

தொடர்ந்து காலை 9.15 மணிக்கு மூலவர் மகா அபிஷேகம், சிறப்பு விக்ரகம், வேதமந்திரங்கள், 10 மணிக்கு யஜமான ஆச்சார்ய மரியாதை, 10.15 மணிக்கு பொது தரிசனம், மாலை 5 மணிக்கு பெருமாள் தாயார் புறப்பாடும் நடக்கிறது. இதற்கான ஏற்பாடுகளை தக்கார் கோ.கிருஷ்ணகுமார், செயல் அலுவலர் பி.பிரபாகரன் மற்றும் பணியாளர்கள் செய்து வருகின்றனர். கும்பாபிஷேக விழாவையொட்டி திருவிடைமருதூர் டிஎஸ்பி ஜாபர் சித்திக் தலைமையில் 150 போலீசார், 75 ஊரக போலீசார் பாதுகாப்பு பணியில் ஈடுபடுத்தப்பட்டனர். பக்தர்களின் வசதிக்காக அரசு போக்குவரத்து கழகம் சார்பில் சிறப்பு பஸ்கள் இயக்கப்பட்டன.