“அது ஆயுர்வேத பீடி” – ‘குண்டூர் காரம்’ பட காட்சிகள் குறித்து மகேஷ்பாபு விளக்கம்

ஹைதராபாத்: குண்டூர் கரம் படத்தில் ஆயுர்வேத பீடி பயன்படுத்தியதாக நடிகர் மகேஷ் பாபு விளக்கம் அளித்துள்ளார். இது தொடர்பாக அவர் சமீபத்தில் அளித்த பேட்டியில், “குண்டூர் கரம் படத்தில் பயன்படுத்தப்பட்ட பீடி உண்மையான பீடி அல்ல. இது ஆயுர்வேத பீடி. இதில் புகையிலை தொடர்பான பொருட்கள் எதுவும் இல்லை. மாறாக இலவங்கப்பட்டை இலைகளால் செய்யப்பட்ட பீடி. முதலில் எனக்கு ஒரு உண்மையான பீடியை படக்குழுவினர் கொடுத்தனர். புகைபிடித்த பிறகு எனக்கு ஒற்றைத் தலைவலி வந்தது.

இந்த விவகாரம் உடனடியாக இயக்குநர் திரிவிக்ரமின் கவனத்துக்குக் கொண்டு செல்லப்பட்டது. மேலும், இதை என்னால் புகைக்க முடியாது என்றேன். பின்னர், குழுவினருக்கு ஆயுர்வேதத்தில் தயாரிக்கப்பட்ட பீடி வழங்கப்பட்டது. இதில் எந்த பிரச்சனையும் வராது என்று சொன்ன பிறகுதான் புகைபிடித்தேன். நான் புகைபிடிக்க மாட்டேன், அதை ஊக்குவிக்கவும் மாட்டேன்,” என்றார்.

குண்டூர் கரம்: அல்லு அர்ஜுன் நடித்த ‘ஆள வைகுண்டபுரமுலோ’ படத்தின் மூலம் கவனம் பெற்றவர் இயக்குனர் திரிவிக்ரம் ஸ்ரீனிவாஸ். இவர் இயக்கத்தில் மகேஷ் பாபு நடித்த படம் ‘குண்டூர் கரம்இப்படம் மகர சங்கராந்தியை முன்னிட்டு ஜனவரி 12ஆம் தேதி திரையரங்குகளில் வெளியானது. தமன் இசையமைத்துள்ள இப்படத்தில் ஸ்ரீலீலா, மீனாட்சி சவுத்ரி, ஜெகபதி பாபு, ஜெயராம், சுனில், ரம்யாகிருஷ்ணன், பிரகாஷ்ராஜ் மற்றும் பலர் நடித்துள்ளனர்.

ஆக்‌ஷன்-எமோஷனல் என்டர்டெய்னர் படமான இப்படம் கலவையான விமர்சனங்களைப் பெற்று வருகிறது. ரூ.150 கோடி பட்ஜெட்டில் உருவாகியுள்ளதாக கூறப்படும் இப்படம் முதல் நாளில் உலகம் முழுவதும் ரூ.94 கோடி வசூலித்துள்ளதாக தயாரிப்பு நிறுவனம் அறிவித்துள்ளது. மகேஷ் பாபுவின் படங்களில் அதிகபட்ச ஓப்பனிங்கை இந்தப் படம் பெற்றுள்ளதாகவும் தெரிவிக்கப்பட்டுள்ளது.