மகேஷ்பாபு படங்களில் அதிகபட்ச ஓபனிங் – ‘குண்டூர் காரம்’ ரூ.94 கோடி வசூல்!

ஹைதராபாத்: மகேஷ் பாபுவின் ‘குண்டூர் கரம்’ திரைப்படம் உலகம் முழுவதும் முதல் நாளில் ரூ.94 கோடி வசூலித்துள்ளதாக தகவல் வெளியாகியுள்ளது.

அல்லு அர்ஜுன் நடித்த ‘ஆள வைகுண்டபுரமுலோ’ படத்தின் மூலம் கவனம் பெற்றவர் இயக்குனர் திரிவிக்ரம் ஸ்ரீனிவாஸ். இவர் இயக்கத்தில் மகேஷ் பாபு நடித்துள்ள ‘குண்டூர் கரம்’ திரைப்படம் சக்ராந்தி பண்டிகையை முன்னிட்டு நேற்று (ஜன. 12) திரையரங்குகளில் வெளியானது. தமன் இசையமைத்துள்ள இப்படத்தில் ஸ்ரீலீலா, மீனாட்சி சவுத்ரி, ஜெகபதி பாபு, ஜெயராம், சுனில், ரம்யாகிருஷ்ணன், பிரகாஷ்ராஜ் மற்றும் பலர் நடித்துள்ளனர்.

ஆக்‌ஷன்-எமோஷனல் என்டர்டெய்னர் படமான இப்படம் கலவையான விமர்சனங்களைப் பெற்று வருகிறது. இந்நிலையில், ரூ.150 கோடி பட்ஜெட்டில் உருவாகியுள்ளதாக கூறப்படும் இப்படம் முதல் நாளில் உலகம் முழுவதும் ரூ.94 கோடி வசூலித்துள்ளதாக தயாரிப்பு நிறுவனம் அறிவித்துள்ளது. மேலும் மகேஷ் பாபு படங்களில் அதிகபட்ச ஓப்பனிங் பெற்ற படம் இது என்றும் தெரிவிக்கப்பட்டுள்ளது.

ஆந்திரா, தெலுங்கானா பகுதியில் போட்டிக்கு படம் இல்லாததால், நேற்று ரசிகர்கள் குவிந்தனர். இதற்கு முன் கடந்த ஆண்டு மகேஷ் பாபு நடித்த ‘சர்க்காரு வரி பட’ படம் முதல் நாளில் ரூ.75 கோடி வசூல் செய்தது.