“மாற்றங்களை நிகழ்த்தியவர் கருணாநிதி” – சூர்யா புகழாரம் @ ‘கலைஞர் 100’ விழா

சென்னை: “பராசக்தி விடுதலையாகி 17 ஆண்டுகளுக்குப் பிறகு ஆட்சிக்கு வந்த மறைந்த முன்னாள் முதல்வர் கருணாநிதி, மனிதர்களால் இழுக்கப்படும் ரிக்‌ஷாக்களை ஒழித்தார். முதலாவதாக, அவர் ஒரு படைப்பாளி. அப்படிப்பட்ட படைப்பாளி கலைத்துறையின் நூற்றாண்டு விழாவை ஒன்றாகக் கொண்டாடியதை முக்கியமான நிகழ்வாகப் பார்க்கிறேன்” என்றார் நடிகர் சூர்யா.

சென்னை கிண்டியில் உள்ள ரேஸ்கோர்ஸ் மைதானத்தில் தமிழ் திரைப்பட தயாரிப்பாளர்கள் சங்கம் சார்பில் கலைஞர் 100 என்ற பெயரில் கருணாநிதியின் நூற்றாண்டு விழா நடைபெறுகிறது. இதில் முதல்வர் மு.க.ஸ்டாலின், நடிகர்கள், ரஜினி, கமல் இதில் திரையுலகைச் சேர்ந்த ஏராளமானோர் கலந்து கொண்டனர்.

விழாவில் நடிகர் சூர்யா பேசுகையில், “சமூகத்தில் பெரிய மாற்றங்களை ஏற்படுத்தும் போக்கை உருவாக்கியவர் மறைந்த முன்னாள் முதல்வர் கருணாநிதி. அரசியலில் பல மாற்றங்களை கொண்டு வந்தார். சொத்தில் பெண்களுக்கு சம உரிமை, ஒடுக்கப்பட்ட மக்களுக்கு உரிமை என பல்வேறு மாற்றங்களை கொண்டு வந்துள்ளார்.

மேலும், அவர் சினிமாவை கைவிடவே இல்லை. அதனால்தான் அவரை ‘கலைஞர்’ என்று மரியாதையுடன் அழைக்கிறோம். ‘பராசக்தி’ படத்தில் கை ரிக்ஷாக்காரனைப் பார்த்து சிவாஜி கலங்குகிறார். அப்போது ஒரு போலீஸ்காரர், ‘நீங்க ஆட்சிக்கு வந்து சண்டை போடணும்’னு படத்துல வரும். ‘பராசக்தி’ படம் வெளியாகி 17 ஆண்டுகளுக்குப் பிறகு ஆட்சிக்கு வந்து மனிதர்களால் இழுக்கப்படும் ரிக்ஷாக்களை ஒழித்தவர் மறைந்த முன்னாள் முதல்வர் கருணாநிதி.

முதலாவதாக, அவர் ஒரு படைப்பாளி. அப்படிப்பட்ட ஒரு படைப்பாளி தனது நூற்றாண்டு விழாவை கலைத்துறையினருடன் இணைந்து கொண்டாடுவதை முக்கியமான நிகழ்வாகவே நான் பார்க்கிறேன். கருணாநிதிக்கும் அவரது பேனாவுக்கும் எனது வணக்கங்கள். அவரைப் பார்த்து ஆசி பெற்றதை நினைத்து மகிழ்ச்சி அடைகிறேன்” என்றார் சூர்யா.