ரசிகர்களுடன் விஜய் க்ளிக்கிய செல்ஃபி @ GOAT ஷூட்டிங் ஸ்பாட்!

சென்னை: தமிழ் திரையுலகின் முன்னணி நட்சத்திரங்களில் ஒருவரான நடிகர் விஜய் தனது ரசிகர்களுடன் செல்பி எடுத்து மகிழ்ந்தார். இது நடந்தது ‘GOAT’ படத்தின் படப்பிடிப்பு தளத்தில்.

விஜய் தற்போது வெங்கட் பிரபு இயக்கத்தில் கோட் என்ற படத்தில் நடித்து வருகிறார். ஏஜிஎஸ் நிறுவனம் தயாரிக்கும் இப்படத்திற்கு யுவன் ஷங்கர் ராஜா இசையமைத்துள்ளார். இதில் விஜய் 2 வேடங்களில் நடிக்கிறார். இதன் படப்பிடிப்பு கடந்த ஆண்டு அக்டோபர் மாதம் சென்னையில் பூஜையுடன் தொடங்கியது. படப்பிடிப்பு மிக வேகமாக நடந்து வருகிறது.

இப்படத்தில் மீனாட்சி சவுத்ரி கதாநாயகியாக நடிக்கிறார். மேலும் பிரசாந்த், மோகன், பிரபுதேவா, சினேகா, லைலா, ஜெயராம், ரம்யாகிருஷ்ணன் மற்றும் பலர் முக்கிய வேடங்களில் நடிக்கின்றனர். சமீபத்தில் இந்த படத்தின் போஸ்டர்கள் வெளியாகி கவனத்தை ஈர்த்தது. இந்நிலையில், சென்னை அருகே கிழக்கு கடற்கரை சாலையை ஒட்டியுள்ள பகுதியில் படப்பிடிப்பு நடந்தது. இதையறிந்த ரசிகர்கள் அங்கு விரைந்தனர்.

தன்னைப் பார்க்க ரசிகர்கள் வந்திருப்பதை அறிந்த விஜய், படப்பிடிப்பு தளத்தில் நிறுத்தப்பட்டிருந்த வேனில் ஏறி ரசிகர்களை சந்தித்து உற்சாகப்படுத்தினார். தொடர்ந்து செல்பி எடுத்தார். இதனை அவரது ரசிகர்கள் சமூக வலைதளங்களில் ட்ரெண்ட் செய்து வருகின்றனர். விஜய் தனது ரசிகர்களுடன் செல்பி எடுப்பதை வழக்கமாக கொண்டுள்ளார். ‘மாஸ்டர்’ படத்திலிருந்து இந்த பாணியை பின்பற்றி வருகிறார்.